08 febreiro 2021
O Paseo Alcalde Blanco está a avanzar na súa execución para converterse nun espazo urbano moderno, sostible e integrado con mar. Unha nova área urbanística para o goce da veciñanza, coa que converter o punto neurálxico da nosa vila nun lugar de encontro e de relación directa coa natureza.
A UTE de empresas Prace – Emergis Construcciones é a que se está a encargar deste proxecto, que cambiará radicalmente a relación do núcleo urbano de Marín coa súa fachada litoral. A compoñente paisaxística será a gran protagonista da humanización do paseo, cunha mellor integración entre este e a zona na que se ubicará o Auditorio, así como co resto do casco urbano de Marín. “Queremos crear espazos agradables, de esparexemento para os nosos veciños e veciñas, aproveitando todos os recursos que temos e a nosa espectacular paisaxe”, engadiu a alcaldesa.
Tal e como se detalla na memoria do proxecto, na punta do paseo crearase unha nova zona de transición, consistente nunha peza de madeira a modo de graderío, onde tamén se habilitarán pequenos miradoiros.
Asemade, o proxecto contempla a creación de áreas verdes amplas abondo para acoller diversas especies vexetais, seleccionadas previamente, que sirvan de barreira visual cara a infraestrutura portuaria que colinda co paseo. Nestas áreas tamén haberá espazo para albergar bancos de descanso, elementos de xogo infantil, xogos acuáticos…
Ademais, a humanización deste paseo suporá tamén a implementación dun novo local de hostalaría, cuxo deseño estea integrado ca contorna e que conte con amplos ventanais, facilitando a prestación das vistas ás persoas que vaian facer uso del.
O orzamento total ascende a 1.312.653,45 euros (sen IVE), que están financiadas nun 80% polo Fondo Europeo de Desenvolvemento Rexional (FEDER) da Unión Europea, no marco da estratexia Marín Dusi.
