O inicio do curso escolar é unha das cuestións que máis preocupa nestes momentos ás familias, alumnado e equipos directivos, pola necesidade de que este arranque se realice de xeito seguro no contexto da situación sanitaria que vivimos pola pandemia da Covid19.
Conscientes desta preocupación e co obxectivo de poder coñecer de primeira man as dúbidas e de expoñer as medidas que se tomarán por parte do Concello, a alcaldesa, María Ramallo e a concelleira de Educación, Marián Sanmartín, mantiveron, durante estes últimos quince días, reunións, centro a centro, con representantes das directivas e das Ampas co obxectivo de trazar as medidas que se establecerán de cara á reapertura das aulas.
Estas son algunhas das cuestións abordadas nestes encontros:
1.- Protocolo reforzado de limpeza e desinfección
Concello e centros acordaron que se ampliará o horario da empresa concesionaria destesservizos nos centros durante a mañá, en función das necesidades, tendo en conta as dimensións e o número de alumnado de cada centro.
Deste xeito, realizaranse tres limpezas e desinfeccións ao día nos aseos e reforzaranse as limpezas e desinfeccións das zonas comúns.
2.- Reforzo do persoal de conserxería e de limpeza
Aqueles centros que non teñan este servizo contarán con persoal de conserxería ou de limpeza para garantir a súa presenza durante toda a xornada lectiva.
3.- Reforzo de entradas e saídas xunto coa Policía Local
O Concello establecerá un dispositivo de control específico especialmente para os primeiros días de arranque do curso para que se garanta que as entradas e saídas do alumnado dos centros, poida facerse con todas as garantías posibles.
Tanto a alcaldesa como a concelleira de Educación quixeron agradecer profundamente a todos os equipos directivos e ás Ampas todo o traballo e a dedicación que levan investido nestas últimas semanas para que o inicio de curso na nosa vila conte con todos os protocolos activos.
