A praia de Portocelo foi o escenario escollido para repartir as bandeiras azuis que os Concellos da nosa provincia teñen acadado este ano para os seus areais. O coidado das nosas praias e o respecto ao medio ambiente é un dos eixos nos que máis traballa o Goberno local de Marín, para continuar preservando esta contorna costeira do mellor xeito posible, con servizos para a cidadanía.
Recentemente, veñen de rematarse diversas accións das praias, como foi a colocación de novos pasarenas. Tamén nos accesos houbo mellorar, como o recente asfaltado do Viario de Praias á altura de Aguete. Alí, vén de rematarse tamén o pintado dos espazos de estacionamento.
Tal e como informa o Concello, estase traballando na ampliación da contratación de socorristas, para poder así cubrir todas as prazas, xa que despois das probas da pasada semana aínda quedan dúas prazas vacantes. O seu servizo comezará nas praias a partir do 1 de xullo, tal e como acontece todos os anos.
Ademais, o mércores da semana que ven porase en marcha o sistema de conteo informatizado para controlar os aforos das praias. Os datos de ocupación de Portocelo, Mogor, Aguete e Loira traduciranse nun sistema tipo semáforo con catro niveis (baixo, medio, alto e completo) que se poderá consultar a través dunha aplicación informática, que se presentará a próxima semana, da web do Concello e das redes sociais.
Durante o día de onte, colocáronse en cada unha das praias carteis informativos co aforo máximo sobre o que se traballará para establecer estes niveis de ocupación, que son os calculados en pleamar e cunha medición de 4 metros cadrados por persoa:
- Portocelo – 970 persoas – Lonxitude da praia: 350 metros lineais
- Mogor – 1280 persoas – Lonxitude da praia: 400 metros lineais
- Aguete – 1690 persoas – Lonxitude da praia: 900 metros lineais
- Loira – 2645 persoas – Lonxitude da praia: 420 metros lineais
Como medida paralela para controlar o aforo e evitar que se xere máis afluencia especialmente nas horas puntas, o Concello tomou a decisión de non poñer a disposición dos usuarios dos areais os aparcadoiros de apoio que normalmente son xestionados con propietarios particulares.
Por outra banda, tampouco haberá papeleiras, nin duchas nin lavapés e tamén quedarán clausurados os baños públicos, debido á imposibilidade de realizar desinfeccións cada tan pouco tempo como sería esixible en espazos cun número elevado de persoas.
