Os 16 participantes de sexto de Primaria do centro educativo recibiron unha formación en ciberseguridade impartida pola Policía Nacional de Marín.
Marín, 7 abril 2025
Esta mañá, o CEIP de Seixo acolleu o acto de entrega dos carnés de ciberexperto aos 16 alumnos e alumnas de sexto de Primaria que participaron nesta iniciativa educativa impulsada pola Policía Nacional, na que participaron a alcaldesa, María Ramallo, e o xefe territorial de Educación da Xunta de Galicia, César Pérez Ares, así como o xefe da comisaría da Policía Nacional, Javier Rodríguez Fos, e outras autoridades do corpo de seguridade.
Nesta campaña educativa no CEIP de Seixo, a Policía Nacional impartiu unha formación voluntaria á súa segunda promoción, formada por 16 alumnos e alumnas de sexto de Primaria, aos que se lles formou durante unha semana do mes de outubro, a cargo do delegado de Participación Cidadá da Policía Nacional, Rafael Alonso.
Os dezaseis alumnos pasaron a evaluación con gran nota e por iso hoxe se lles entregaron os carnés de ciberexpertos, que os avalan como profesionais en materia de ciberseguridade.
Desde o Concello apóianse este tipo de iniciativas a educar dende o principio as novas xeracións sobre a importancia hoxe en día da ciberseguridade e de que os rapaces e rapazas estén informados e informadas para que tomen en serio este tema, xa que na actualidade é de suma importancia debido a que dende moi cativos empezan usando as novas tecnoloxías.
Durante o acto, fíxoselles un “exame oral”, lembrando algúns dos conceptos aprendidos durante a formación, como o de ciberbullying, o grooming, a pegada dixital…
Tras a entrega dos carnés da man da alcaldesa, o xefe territorial de Educación César Perez deu un discurso sobre o compromiso que adquiriron os participantes de usar responsablemente as redes e finalizou felicitando ao director do centro e á Policía Nacional pola promoción da prevención do ciberacoso.
A alcaldesa María Ramallo recalcou aos alumnos a importancia tanto de defenderse uns a outros con estas novas tecnoloxías como de que non tiveran présa ningunha en empezar a usar o móbil “nos que por desgraza todos estamos absortos a día de hoxe”.
O acto finalizou cunha foto colectiva do alumnado premiado coas autoridades e o equipo directivo do centro.
