As persoas que se están a formar con este programa subvencionado pola Xunta de Galicia teñen dentro da planificación este tipo de saídas, que permiten intercambiar espazos de traballo conxunto coa rede do mercado laboral
Marín, 02 outubro 2024
A inserción laboral e a procura dunha estabilidade económica e da realización persoal son os obxecitvos que se perseguen no Obradoiro Dual de Emprego que o Concello de Marín ten activo e que está a beneficiar a 20 persoas usuarias.
As formacións que se están a desenvolver son de atención sociosanitaria a persoas dependentes no domicilio e en institucións sociais, por unha banda, e de elaboración de produtos da pesca e a acuicultura, por outra.
Durante o que leva camiñado o programa, desde a Dirección do Obradoiro fixeron o balance das empresas e institucións ás que se fixeron visitas, como por exemplo foi ás entidades do Servizo de Axuda no Fogar (Galáurea e Idades), o selo PescadeRías, a Lonxa de Marín, Saraiva, Amencer, a Residencia de Campolongo ou Pescados Molino, entre outras.
Durante esta semana, as saídas continuarán á Asociación de Familias de Persoas con Parálise Cerebral, á Feira de Conxemar e á empresa Cabomar, ubicada na rada marinense.
Por outra banda, realizáronse varias entregas de peixe ao Comedor Social, correspondentes aos módulos prácticos da formación de Pesca e Acuicultura.
Este programa é posible grazas á axuda da Xunta de Galicia, a través da Consellería de Promoción do Emprego e Igualdade, coa financiación do Fondo Social Europeo e a Iniciativa de Emprego Xuvenil.
